Íslenzkar þjóðsögur og æfintýri/Viðbætir/Síra Hallgrímur og draugurinn

Íslenzkar þjóðsögur og æfintýri
Síra Hallgrímur og draugurinn

Þegar síra Hallgrímur var á Hvalsnesi og fór um næturtíma ofan á Heiði mætti honum draugur, og starði hvor á annan um stund. Þá stefjaði draugurinn á prestinn og mælti:

„Hvaðan komstú að hitta mig

hérna ofan af grandanum?

Sendur var ég að sækja þig

frá sjálfum höfuðfjandanum.“

Þá kvað síra Hallgrímur á móti:

„Þú hefir ekki hót með mig

sem helgum var gefinn andanum.

Svo búinn aftur sendi ég þig

sjálfum höfuðfjandanum.“