Þótt þú langförull legðir

eftir Stephan G. Stephansson

Þó[tt] þú langförull legðir

sérhvert land undir fót

bera hugur og hjarta

samt þíns heimalands mót,

frænka eldfjalls og íshafs,

sifji árfoss og hvers,

dóttir langholts og lyngmós,

sonur landvers og skers!

Yfir heim eða himin,

hvort sem hugar þín önd,

skreyta fossar og fjallshlíð

öll þín framtíðar lönd!

Fjarst í eilífðar útsæ

vakir eylendan þín:

nóttlaus voraldar veröld,

þar sem víðsýnið skín.

Það er óskaland íslenskt,

sem að yfir þú býr,

aðeins blómgróin björgin,

sérhver baldjökull hlýr,

frænka eldfjalls og íshafs,

sifji árfoss og hvers,

dóttir langholts og lyngmós,

sonur landvers og skers!

Andvökur, úrval Sigurðar Nordals, 2. útgáfa 1980.