Íslenzkar þjóðsögur og æfintýri/Kímnisögur/Bænarvers kerlingar

Íslenzkar þjóðsögur og æfintýri
Bænarvers kerlingar

Eftir skriftir varð prestur þess var að kerling ein í kirkjunni sat með mikilli andagt og þuldi eitthvað í hálfum hljóðum. Hann vissi að hún var fákunnandi og vildi víst vita hvað hún las, gekk því nær og heyrði að það var staka þessi:

Sté þá niður vopnaviður

vaskur af hesti sínum,

hæstan biður hann himnasmið

að hjálpa sér frá pínum.