Bokki sat í brunni

Bokki sat í brunni er íslensk þula sem til er í mörgum útgáfum. Þessi gerð er í handriti með rithönd Jóns Sigurðssonar forseta (DFS 67, bl. 197r):

Bokki sat í brunni

hafði blað í munni,

hristi sína hringi,

bað fugla að syngja

hjala sem móðir,

ljáðu mér vængi,

svo ég geti flogið

upp til fagra tungla,

tunglið, tunglið, taktu mig,

flyttu mig upp til skýja,

þar situr hún móðir mín

að kemba ull nýja

þar sitja systur

og skafa gullkistur,

þar sitja mágar

og skafa gulltágar,

þar sitja englar

og skafa gullteina,

þar sitja nunnur

og skafa gulltunnur.

Sæll er sá sem sofa má

bæði vel og lengi

undir einni drottningar hendi.